Tunay na hindi lamang angkop kung hindi lubos na napapanahon ang liham na ito para sa ating mga Pilipino kung kaya nararapat lamang na basahin, pagnilayan at pagdasalan nating lahat bilang mga indibidwal, pamayanan, Simbahang lokal, at bansa. Taglay nito ang mahahalagang aral at maging mga kongkretong habilin upang patuloy nating maisabuhay ang diwa at biyaya ng katatapos lamang na Hubileyo ng Awa. Maikli lamang ito kung ihahambing sa iba pa niyang aklat ngunit kung matiyaga at masusi nating pagbubulay-bulayan at pag-uusapan ay malaki ang maiiambag sa ating buhay at lipunan. Tulad nga ng sinabi ng Papa, "tapos na ang Hubileyo at nakapinid na ang Banal na Pinto. Gayunpaman, nananatiling bukas ang pintuan ng awa sa ating mga puso".

(From the back cover)