Kagila-gilalas ang pag-imbulog ni Leni bilang "bagong lider" at ang paglaganap ng kaniyang kilusang boluntaryo sa buong kapuluan, isang kilusang maiwawangki sa biglang pagbulas ng kilusang Katipunero noong 1896 at ng kilusang naging People Power noong 1986.

Ito ang nais kong isalaysay sa librong ito. Upang higit na maging dramatiko ang pagtatanghal, ang mga akda at likhang biswal sa antolohiyang ito ay pinangkat ko sa dalawang kabanata. Ang Unang Kabanata ay paglalantad sa estado ng korupsiyong panlipunan at pampolitika sa Filipinas. Mula sa naturang krisis ay isisiwalat naman ng Ikalawang Kabanata ang nagaganap na paggising ng mga sektor ng lipunan tungo sa paghanap ng bagong pangulo at bagong gobyerno.

Ninais kong magtipon laman ng mga tula. Subalit radikal na nabago ang aking plano dahil sa naganap at nagaganap na rebolusyong pangkultura kaugnay ng eleksiyon. Isinilang ang Kakampink nito lamang bago dumatal ang 2022. Ang dagsa ng pakikiisa sa kampanya ni Leni ay tumanghal sa nagsisikip-sa-tao na mga panimulang rali sa Lungsod Naga at Lungsod Quezon. Dumagsa din ang mga pagpapahayag ng taguyod mula sa mga sektor ng edukador, relihiyoso, at mga politiko. Tinawag ang kilusan na Himagsikang Rosas-- na para sa aking titig ay pagkilala sa halaga ng pagbabagong pangkultura at sa tungkulin ng mga alagad ng sining upang "ipanalo ang Laban ni Leni.

Includes images.